رواية الحياة وردية
life is rosy
نبذه عن الرواية
هى رواية ل محمود الشحات عبد الخالق وهى اول رواية مفسره بالايموشن اصدار 2022
الحياة وردية الجزء الاول
الحياة وردية البداية
كنت اعيش حياة عادية روتينية كأي بشري على سطح هذه الارض حتى تلك اللحظة ... اللحظة التي أيقنت ان كل شي سيتغير ..
: انسة ليال شوفي للكاميرا هنا ... حنبدو في 3 ... 2 ... 1 ...
هاي انا ليال عمري 25 سنة متخرجة من لغة فرنسية ضاربة الحياة في عرض الحائط 😂 للاسف يعني مسببة صداع لكل افراد عائلتي ...
من صغري عندي فرط نشاط غير ع كل الاطفال كل شي نبي نعرفه نستكشف لدرجة ان الجميع توقع ان حنكون دكتورة او عالمة حاجة من هكي 😂 بس كالعادة صدمت الجميع لما دخلت لغة فرنسية ...
ليش اخترت الفرنسية؟ ... شن بنحكيلكم ... واقعة في عشق باريس... برج ايفل في الليل.. الشانزيليزيه المعبي ناس جسر العشاق فوق نهر السين 💜كان حلم حياتي نزورهم 😍🥺 بس مع شخص نحبه 🙈💜
ايه...😁 انا نحب الروايات هلبا كنت مغرومة بقصص ديزني لما كنت صغيرة ... اميرة ويجيها اميرها ع حصان ابيض وينقذها ويعيشو بسعادة ... من غير ضحك خيال طفلة عمرها 10 سنين عادي 😅 لكن خلاص كبرت وعرفت ان ديزني كذبو علينا ومافيش الهابي ايفر افتر ... 🤷🏻♀️😅
قصتي ... اممم ...قصتي غريبة شوي ع المجتمع متاعنا ممكن اللي يسمعها يقول خيال بس ع قولت افلام هوليوود ما سأرويه لكم الآن هو مبني على احداث حقيقية 🤫
حنرجعو سنتين للخلف لبداية احداث قصتنا سنة تخرجي بس قبل التخرج
:ليااااااال
التفت للصوت اللي قعد يصدح في ساحة الكلية ومن غيرها صاحبة الصوت المزعج 🤦🏻♀️ قصدي اللي يهبل🤷🏻♀️ صاحبتي وصديقتي الصدوقة منذ مش عارفة نضت ع الدنيا وهي صاحبتي ...."هاجر"
نشوفلها بعين مسكرة ووجهي متعكرش من قوة العيطة... حرفيا تتكلم بالعياط هالبنت
ليال : منورة عزيزتي منورة تقريبا كل من عايش في مسافة 10 كيلو متر سمعو اسمي 🙂
هاجر : اسكتي ترا 😒 ... وينك انتي 🙂...خاطري بس في حياتي نلقاك اول ما ندورك والتليفون هادا دايرتيه اكسسوار بس... مش معقولة انتي 😡...قعدة نستنى فيك في الشمس سااااعة وانتي. .....
" عارفين الاسطوانة هادي لازم نسمعها كل يوم ... ومزال في اسطوانة اسوء منها بهلبا حتعرفوها بعدين 🙂"
ليال : كملتي ؟ ...
هاجر : مبرد دمك يا بنت
ليال : باهي عارفة باردة... ممكن توا نمشو نبي ناخد قهوة لان انتي زدتي صدعتيني اكتر من وانا مصدعة وبعد شوي عندي محاضرة مزعجة اكتر منك 🙂
ومشيت وخليتها واقفة تعيط وتتذمر زي كل مرة
" هاجر ... بالنسبة ليا دعامتي في الحياة من غيرها ممكن ننهار في اي لحظة هي الاخت اللي ماجبتها امي ...💜
كيف عرفت هاجر؟ ... تصدقو مش عارفة بس نتذكر ان في عركة في المدرسة ودافعت عليها ومنها قعدنا ديما مع بعض اصحاب لعند توا 😅💜 ... كنت عاقلة بس هما يخلو فيا نطلع اسوء ما فيا 🙈"
وصلنا الكافيتيريا طلبت قهوتي المعتادة وطلبت لهاجر معاي وقعدت نستنى فيها نسمع في حد وراي قال
:لو سمحت ..طلبية الانسة الحلوة اللي بالهودي الاسود عليا نا ...
تلفتت ونا رافعة حاجبي وقلت : بلكي تبطل حركات المراهقين هادي ...
ضحك وقال : ابدا ... لعند تعطيني وجه يا سمح 😌
لفيت عيوني ونا نحاول ندس ضحكتي عليه
"نسيت نقوللكم ع العضو الثالث في الكلوب متاعي ... عمر ... اكثر انسان انا مش عارفة علاش عايش 🤦🏻♀️ هالبني ادم لا عنده طموح لا شي في الحياة غير انه يعيش كل يوم بيومه وخلاص 😅 ممكن لانه حبيب البابا والماما ... حي لو يسمعني يصلبني ع اول عمود ضي 😅🤫
عمر الولد الوحيد لعيلته.... وعيلته يعتبرو من عائلات الطبقة المخملية اصحاب شركات استيراد ادوية
كيف عرفت عمر؟ ...
عمر عرفته بالصدفة في الثانوية كنا ندرسو تخصص ادبي مع بعض بس تقوت معرفتي بيه لما يتلاقو العيلتين...
بالرغم ان تخصصنا تخصصات مختلفة الا ان مزال نجتمعو زي هاجر اللي تخصصت لغة انجليزية وعمر اللي تخصص ادارة اعمال "
عمر : ام قلب كبير انتي سامحتيني ولا
ليال : زيد غادي عليا لا قلب لا كلاوي ... في حد بعقله يدير اللي درته ...
خديت طلبي وطلب هاجر وطلعت وعمر وراي
عمر : حطي نفسك مكاني تي اتزنقت زنقة كلب
شفتله برفعة حاجب : رحم الله امرء عرف قدر نفسه
عمر : ما انتي غير ....
سكت شوي لعند فهم القصد وبعدين قال : مقبولة منك 🙂
انفجرت بالضحك قدامه لعند جت عيني ع هاجر واللي كانت. واقفة مع حبيبها خفت ضحكتي وتلفتت الجهة الثانية..
" نعيم ... اخبث عباد الله لو الشيطان متجسد في بني ادم. حيكون هو 🙂 المشكلة هاجر العبيطة عارفة بس تحبه بشكل مش طبيعي ... حاولت نقنعها تفوت الموضوع بس شي ولا كأن وهو بكل ثقة يقوللها ليال غيرانة منا ... هالتافه 🙂 .....وحتعرفو في الجاي ليش انا نكرهه هكي "
شاف عمر للجهة اللي قعدة فيها هاجر ونعيم وبعدين التفتلي وقال ..
عمر: قعدة الغبية ماتبيش تفهم ؟
تنهدت : اللي عليا درته بس هي مصرة
عمر : حكيتيلها ع الموضوع ؟
ليال : اكيد لا ... مستحيل نحكيلها ..
تلفتت جهتها وتنهدت : مش هاين عليا نكون انا السبب في كسر قلبها ومش هاين عليا نخليها هكي تجري وراه زي العمية ...
شفت للقهوة اللي في يدي : وتوا هادي ان شاء الله من بيشربها بعد ماخلتني نشريها
جبد عمر الطاسة الثانية مني
عمر : ونشربوها احني نستاهلو حاجة بعد شياط الريق اللي درتيهولي 😒
شفتله وهزيت راسي بأسف وابتسمت وكملت الطريق لقسمي وعمر يمشي جنبي ونقرمو في اللي يفوتو جنبنا تقصيرا للطريق
دخلت للمحاضرة المستفزة .... والله نحبه التخصص لكن اللي جايبينهم مختارينهم ع حسب من يقدر يجلط الطلبة اكتر 🙂 بس اللي صار اليوم جلطة من نوع اخر 🤭
قعدين كالعادة نستنو في الدكتور ونا من النوع اللي مانحبش الاختلاط بالبشر اغلبهم مزيفين ونا مانتحملش النوع هادا 🤦🏻♀️
حطيت طاقية التوب ع راسي ونخربش في مذكرتي نين حسيت الجو قعد هدوء بكل وبعدين سمعت صوت غريب قال
: السلام عليكم ..
قمت عيوني واذا به شاب واقف امامنا ويبتسم حطيت يديا تحت ذقني واتكيت عليهم وقعدت نفصل فيه الشعر القهوي واللحية والعيون العسلية وواضح عليه من جماعة الرياضة وقيافته مسطرة الباين انه انسان جدي في حياته بس من ابتسامته ونظراته متوتر وخاصة انه كل شوي يحرك الخاتم اللي في يده اليسار ...
" ههههه طبعا عندي عادة سيئة واللي هي نحب نحلل شخصيات الناس نتأمل في الناس ... عمر ديما يقولي اني' سايكو ' 🤭😁 بس هالعادة اول مرة تسببلي مشكلة هكي ..."
ونا في عز انسجامي بالتحليل وانتقلت حتى ع الطلبة اللي معاي ومع ملامحي اللي يتغيرو مع حديثي مع نفسي رجعت نظري ليه لقيته يشوفلي ويبتسم ... 😳
وجهي قلب الوان وخشيت بعضي ونا نلعن في روحي تو يحسابني وحدة من الخفيفات اللي مقعمزات في الطاولة اللي مقابلتني
درت روحي لاهية في المذكرة ونسمع فيه يقول
: انا بإذن الله حنكون مساعد للدكتور عبدالجليل بحكم وضعه الصحي ميسمحلاش يجي هلبا للجامعة .. وان شاء الله نكون قد المسؤولية وقد ثقة الدكتور فيا .. سكت شوي وقال بضحكة : عاد ساعدوني الموضوع جديد عليا بيش نساعدكم 😁
شفتله برفعة حاجب وقلبت عيوني وقلت لنفسي :ايييه علينا مايجيبو كان في الاهبل وخوه مابهاك يا دكتور عبدالجليل ...
واللي ماكنتش نعرفه ان كان مراقب كل حركاتي طول المحاضرة
خدي ورقة في يده ووقف : توا نبي منكم كل حد يكتبلي اسمه رباعي ورقم قيده واللي يكتب يقدر يتفضل حنبدا في المنهج من المحاضرة الجاية ان شاء الله
وقعد يلف ع الطلبة واحد واحد وقعدت انا اخر وحدة
خديت البيرو وكتبت اسمي ورقم قيدي وخديت شنطتي من غير مانشوفله ونا كيف طالعة سمعته وراي يقول
: ليال سعد ....
التفتله وع وجهي ملامح استفهام
شافلي بإبتسامة 😊
: المحاضرة الجاية حتشرحي معاي الدرس
قعدت واقفة وعيوني وفمي مفتوحات من الصدمة ونا في خاطري غير نبدو 😳
وخدي الورقة طبقها وفات من جنبي وخدي شنطته وطلع
رجعلي عقلي ولحقته ونا نضبح : يا استاذ ...ميسيووو ..اووف شن سماه ربي ...
سمع الجملة الاخيرة وقف وقعدة الابتسامة ع وجهه : لو كنتي منتبهة بكري كنتي عرفتي شن سماني ربي 😊
وقفت ونا نجبد في كم التوب 'حركة فيا لما نتوتر🤦🏻♀️' : اسفة ع امبكري والله كنت سرحانة وديما تصيرلي و....
قطع عليا وهو يضحك : حصل خير ... بس قعد ع قراري المحاضرة الجاية حتشرحيها معاي
ليال : بسس.....
ومشي وخلاني واقفة زي الهبلة تاني 🙂 بس ماطولش رجعلي وقال : واسمي مراد ...
ومشي ونا قعدة واقفة زي البلهاء نشوفله من وين مشي نين قطع حبل افكاري التليفون يرن لقيتها هاجر
رديت :نعم جوج
هاجر : نستنو فيك في الساحة ره
ليال : دقيقة ونوصل فيكم
وسكرت الخط وطلعت ونا في بالي كيف حنتفاهم مع البني ادم الدراه اللي ابتسامته تجنن ... اخخخخ ليال حسبي الله وخلاص انسي انسي وفكري في مصيبة المحاضرة اللي بتشرحيها وانتي ماعارفة فيها شي 🙂 يا غيبتك يا جليل 😭🙂
الحياة وردية الجزء الثاني
التفاصيل الصغيرة
الجزء الثاني : التفاصيل الصغيرة
طلعت لهاجر ونا قعدة مسبوهة من الموقف 😳
هاجر : لياااااال هناااا ...
شفتلها ولملمت شوية العقل اللي قعدو فيا وجيتها كانت قعدة وهي ومجموعة بنات تعرفهم في قسمها أميرة وسعاد وفاطمة
"الحق البنات هادو لطيفات بكل عكس باقي البنات اللي نشوف فيهم بالرغم ان زي ماقلت قبل عندي عقدة من البشر الا ان حبيت وجودهم في دائرة معارفي وفيهم جو خاصة فطومة مش طبيعية البنت 😅 "
سلمت عليهم ووصلت في فاطمة شبحتلي ورقصت حواجبها وقالت : شن هالخبر اللي يحكو فيه جماعة الفغونسي ؟
شفتلها بإستغراب : خبر شنو ؟
ضربتني ع كتفي وقالت : المعيد القنين يا دماغ 🙂
ليال : عادي تسأليني ونجاوبك من غير ضرب ره 🙂 وبري مش حاكيتلك هي 😒
نضت ودرت روحي متنرفزة منها
جتني تجري
فاطمة : لالالالا ليالي العسل انتي حبيبتي انتي والله عطيني كسرة باهي هي احكيلي عارفتيني مانحبهم وجوه نابليون وماعندي غيرك في القسم الاجرب هادا 🥺😅
شفتلها ع جنب وضحكت وتاخدني عمتكم فطوم بالاحضان نين خنقتني 😫
ونا نعيط تحتها : اطلقيني يا هم انخنقت نهاري ... ره نبطل
نطت وقعمزت : لالا خلاص ها سكتت وقعمزت وهي احكي 🤭
ليال: هادا يا حناتي ...... وحكيتلهم قصة المعيد لكن من غير مانحكيلهم جزئية المحاضرة اللي طلب مني نشرحها والمحادثة اللي دارت بينا ..
سعاد : والله انتو يا جماعة الفرنسي حظكم يفلق الصخر يجيبولكم كان في اشباه دي كابريو يا قهرتنا احني وخلاص 🥺 كلهم يشبهو لعمي العارف اللي في راس الشارع 🙂
أميرة : استغفر الله انتي وياها بطلو تتسهوكو ع عباد ربي 😒
فاطمة: كانت معاكم الشيخة أميرة اثابك الله نوضي من قدامي هي 😒🙂
هما يتعاركو ونا نفكر في اللي صار وابتسامته ابتسمت لا اراديا وهاجر معاي نخصتني وحركت راسها بمعنى شن في؟
رديت عليها بمعنى بعدين 🙄
هاجر : هيا ليال وقت ع الحوش... نستأذنوكم بنات 🌸
فاطمة -أميرة- سعاد : اذنكم معاكم نتلاقو 🌸
استأذنا من البنات وطلعنا وين واقفة السيارة كيف بنفتح الباب شدتني هاجر من يدي
هاجر : بما ان قعدنا بروحنا يلا احكي
ليال : شن بنحكي؟. .. ما حكيتلكم
شبحتلي ع جنب
هاجر : لياااال .... ع منو يا لولو مافيش حد يعرفك زيني احكي قبل ما نجيبلك عمر يطلعها منك غصب عليك توا 🙂
قلبت عيوني وقلت : اوكي تمام اركبي ونحكيلك في الطريق
ضحكت هاجر وركبت السيارة
طول الطريق ونا نحكيلها ع الموقف السخيف اللي درته لروحي وبعدين موقف المحاضرة الجاية وكيف حكالي اسمه
هاجر : تي هادا معجب من اول نظرة اسمعي مني
شفتلها ع جنب 😒 وقلتلها ونا نقلد في صوتها : هادا معجب من اول نظرة .... عمية ان شاء الله... انقوللها استاذي تقولي معجب..... ممكن تذكريني علاش مصاحباتك انا 😒
هاجر : باهي باهي صحيتي تو ترجعي لكلامي وتقولي قالتها هاجر هاداك اليوم 😌😂
وقفت قدام حوشهم وقلتلها : انزلي انزلي هادا مافالحة فيه انتي كان تفلحي هكي في قرايتك تجيبيها من الاوائل 😒
شبحتلي ع جنب حتى هي 😒
ليال : تي بالك انزلي 😒
هاجر : خزي تلز فيا مافيش صاحب بيتصاحب 😒
نطيت فيها فتحت الباب وهربت تضحك ودراتلي باي 👋 وهي داخلة رديتلها 👋 ونا نضحك ولفيت ورجعت للحوش
وصلت قدام الحوش
فتحت الباب دخلت السيارة وسكرته وراي
ونا نازلة شفت خوي مقعمز في الجنان شاد تليفونه ويضحك
" انا الكبيرة في الحوش والكبير الله عز وجل 😁 عندي اخ واخت اصغر مني يوسف 23 سنة و نسمة 21 سنة ... ماحاولتش نكون الاخت الكبيرة الشريرة انا بالنسبة ليهم صديقة وديما نساعد فيهم حتى لما يغلطو يجوني انا مش لأمي او لبوي ... وخاصة يوسف مكانته بروحه بالنسبة ليا 💜 حتى نسمة قلبي بيش ماتزعلش 😅 "
مانتبهش عليا ونا جاياته لما وصلت فيه سكر التليفون وقام راسه وقال : روحتي ؟
جيت قعمزت جنبه وحطيت رجل ع رجل : لا الحق قعدة في السيمافرو نكلم فيك من بوابة موازية 😂😒
شافلي ع جنب : لا والله رايقة الاخت 😒😅
ليال : انت اللي رايق ورقصتله حواجبي وكملت : ها شن تحكيلي ... شن سر الابتسامات العبيطة والسرحان ... 😉
كيف بيتكلم يوسف قاطعته و قمت صبعي بتهديد☝️ : ردبالك تكذب عليا ره مراقباتك 🧐
يوسف قام يديه فوق : اوكي اوكي حضرة المحقق توقوموري شوي شوي 😅🙌
عدل تقعميزته وقابلني : في بنت ..
قاطعته بعيطة 😍😱
يوسف : اشششششش يا متع الفضايح 😳😰
ليال : اوكي خلاص سكتت 🤭🤫😅 وحطيت يديا ع فمي واشرتله بـ كمل
تنهد يوسف وكمل : البنت هادي عاجبتني من فترة وو... وسكت 😥
ليال : و شنو خيرك سكتت 🙄
تنحنح يوسف وعدل تقعميزته تاني : نبيكم تخطبوهالي 😁
نقزت نعيط ونزغرط وهو يشد فيا ويأشرلي بمعنى اسكتي 😱😰🤫
قعمزت بعد الوصلة اللي درتها وقعدت نشوفلها بنظرات غريبة 🥺
يوسف : خيرك تشوفيلي هكي 😕
ليال : والله وكبرت يا وسيفة وبنزوجك ريت ريت الزمان كيف يجري كنت هكي كبرك 🤏 كميشة 🥺
شافلي ع جنب 😒 وقال: تحشمي ع وجهك ره بينا سنتين بس 😒 ..... كميشة قالها وهو يعلق ع صوتي
ضربته بالشنطة : الحق في اللي يعبرلك ع مشاعره 😒
سكتت شوي وكملت : ايه قولي ..من سعيدة الحظ ان شاء الله ؟ 😍
يوسف انقلبو ملامحه للتوتر وقال : نقولك ... بس اوعديني من غير تعصيب وعياط 😥
عدلت تقعميزتي وهربت الضحكة لان ملامحه نعرفهم لما يغلط في حاجة هكي يقلب شكله
ليال : ليش بنعصب ونعيط عليك يعني من تكون هي ؟ 🤔
يوسف : سهير
فنصت فيه وعيطت : سهيييير .... سهير بنت عمك .... عمك مصطفى .... اللي ورانا ... عمك عمك ... 😱
يوسف يشوفلي من تحت وهز براسه بمعنى ايه 😥
ضحكت بصدمة ووقفت : لالالالالا يوسف انت ناوي تجلط امك بالرسمي المرة هادي ...😱😳
" خلوني نوضحلكم نقطة هكي صغيرة جدا 🤏 المية والنار ممكن يتلايمو والزيت والمية ممكن يتخلطو مع بعض اما احني وحوش عمي مصطفى لا يمكن نتلاقو بأي صفة كانت 🤦🏻♀️ هو انا بجد مش عارفة ليش وامتا وكيف بس من يوم وعينا ع الدنيا ومرت عمي وامي مايتحابوش هو تبو الصراحة مرت عمي سوسة بكل مش محبوبة في العيلة كلها 🤷🏻♀️هادا لا يعني ان امي ملاك لاااا ... امي ... ولا نقوللكم تو تتعرفو عليها كويس في الجاي 😅"
نضت وسيبته وهو ينادي فيا ونا نمشي نتمتم : قال سهير قال من قلة البنات ع الكرة الارضية ... تي والله حتنفتح حرب احرف من حرب البسوس في العيلة ... ربي يهديك يا وسيفة وخلاص .. 🤦🏻♀️
: طقو الفيوزات ولا مزال 🙂
سيداتي سادتي امي العزيزة التي تعرف بإسم زوبة 😅💜🙂
ليال: حيطقو اصبري عليهم شوي بس يا زوبة 🙂
زينب : نوضي غيري وكان بتتغدي ... وراثة لمن بتطلعو لعيت بوك كلهم مطقوقين 🌚
شفتلها بتضييق عيون : وعلاش مانطلعش وراثة لعيت خوالي يا زوبة 🤷🏻♀️😂😉
وهربت نجري لداري وخليتها وراي تعبرلي ع قداش انها ماعرفتش تربي واني لساني طويل ومش طالعتلها بكل 🙂🤣😂
" علاقتي بأمي علاقة اصحاب مش ام وبنتها نحب نستفزها ديما ونا مبهدلتها 😅 بالرغم ان كلامها احيانا قوي و 'حار' ع قولت ناس زمان لكن اطيب منها مافيش 💜 مستحيل تأذي شخص قصدا الا لو هو أذاها قبل ✋تعجب فيا قوتها وكلهم يقولو ان انا وارثة منها القوة وديما نسمع في جملة 'ليال بنت امها' قداش نحبها لما يقولوهالي 💓"
دخلت للدار لقيت نسمة راقدة من غير غطاء ..
غطيتها وغيرت وطلعت للكوجينة خديت غداي وتوجهت للصالة ..
لقيت بوي وأمي يتفرجو ع التلفزيون جيت قعمزت جنبهم شبحتلي زوبة ع جنب 😒 : نوووضي
شفتلها ونا حاطة الكاشيك في فمي واشرتلها بـ خيرك 🙄
زينب : نوضي جيبي فرشة زي البني أدمية طلعت روحي ونا نضم في الدنيا
ليال : كيف طلعت روحك 🤔 يعني اللي يكلم فيا توا شبح ولا كيف 🤣
شبحتلي وبعدين التفتت لبوي : شفت بنتك قلة الادب كيف تحكي معاي 🙂
سعد: ليال فكينا مصدع من الخدمة 🤦🏻♂️
شفتلهم الزوز بنظرة حزينة 🥺 : ونا اللي جاية نغيرلكم في جوكم اهو ماشية 😒
وقمت سفرتي وطلعت للجنان مشيت وين خليت يوسف بس مالقيتاش قعمزت في مكانه وقعدت ناكل وفتحت الفيس نتصفح خطرتلي فكرة خطيرة 🤭 فتحت البحث في قروب القسم متاعنا وكتبت اسمه وقعدت نستنى طبعا ماكنتش عارفة اسمه بالكامل طلعولي هلبا بإسم مراد : يا والله حالة 🙂🤦🏻♀️
قعدت ندخل بالايميل ونتصفح بس اغلبهم ماكانش فيهم صور
لقيت زوز مربوطات بإنستاقرام دخلت عليهم والمفاجأة لقيته واكاونت عام حاط شوية صور ليه واقتباسات وجو فتنس : تحليلي طلع صح بيش يعرف عمر انا مش سايكو 😌😅
كان كل الصور جدية الا وحدة لفتت نظري صورة هو وبنوتة تهبل والصورة الوحيدة اللي يضحك فيها 💜
بيني وبين نفسي : عطيه السلامة ضحكته نووية🤭 ... وشوي وفقت لروحي😳 : نهارك اللي مش فايت يا ليال استاذك هادا لمي نفسك 🙂
وكيف بنطلع من البرنامج خديت نظرة اخيرة ع الصورة ونمشي نديرلها هارت 😱
من الصدمة حطيت التليفون جنبي وقعدت نشوفله ونندب : حي عليا تو يقعد يقول خفيفة وقعدة تقصقص من وراي .... رزيني فيا 😭 وووه بعيد السو عليا خيرني حتى نا🤦🏻♀️😭 قصدي اهدي اهدي ليال خشي نحي اللايك ولا كأن شيء قد حدث اوكي ...
ونا قعدة نطمن في نفسي خشيت ونحيت اللايك وسكرت البرنامج والنت وكل شي والغداء طارت منه النية ...
الحياة وردية الجزء الثالث والاخير
الجزء الثالث : الهدوء قبل العاصفة
فاتو ايام وجي يوم .... وما كان عندي الا محاضرة وحدة .. محاضرته 🤦🏻♀️
من اول مانضت ونا اعصابي محروقة ومش طايقة حد ونمشي ونجي قدام الحوش ونا نستنى في نسمة
ليال: نسسسسسسماااااا .... عندك دقيقة وحدة ماتورينيش وجهك حنطلع ونخليك 🙂
خطم جنبي يوسف : خيرك ع صبح ربي 🙄
ليال :. خليني في حالي انت التاني 🙂
يوسف حط ايده ع راسي ويضحك : بسم الله أرقيك
وهو قعد ماكملش لقاني نشوفله 🙂 جبد ايده وقامها : نبصر وحق الله 😅 ... خطير بكل اللي جايك ع الصبح ان شاء الله مش اللي بالي بس 😅🤭 وهرب يجري لسيارته
غمضت عيوني وكيف بنعيط ع نسمة تاني لقيتها قدامي : لو زدتي ثانية ره خليتك وطلعت 🙂
نسمة : باهي وانتي من صبح ربي عياط هيا اطلعي وقت عليا انا 🙄😒
ومشت قدامي ونا نشوفلها ونهدي في روحي بيش مانشفشفها ع الصبح نايضة متأخر وتقولي وقت عليا نسمع بالعجب نين شفته 🤦🏻♀️
" نسمة ... اسم مش ع مسمى 😅 ابدا ولا ليها علاقة بالهدوء هالبنت ... انسانة تنبالة بإمتياز ...لسانها اطول من برج خليفة ... حبيبة بوها... مايبي فيها شي ومدلعها نين مفسدها علينا 🙂 ... بس مع كل هادا نابغة وذكية .... مش عارفة وين تلقى في وقت وجهد ومساحة في عقلها المسكر هادا ..هههههه ... نبصر بسم الله ماشاء الله هاتو حاجة لوح ندق عليها 😅 ...نسمة .. تخصصت طب ديما خاطرها تطلع دكتورة 💜 حققت حلم العيلة ان يطلع حد فينا دكتور 😅 عكس يوسف اللي دخل قانون ... ديما خاطره يدير تغيير في العالم 💜 ..حاسة بتفاهتي في العيلة هادي 🙂😂 معليش نطير في العين 😎 "
حطيت نسمة في كليتها ومشيت لكليتي
وقفت في الباركينق ومانزلتش من السيارة قعدت ندعي ان مانطلعش مضحكة اليوم 😭
نزلت ومشيت لمبنى القسم ومشيت للقاعة اللي فيها المحاضرة وقعمزت في مكاني ونا نهز في رجلي من الاعصاب ونا نردد داخلي 'ان شاء الله يفوت هاليوم ع خير'
وصلت قبل موعد المحاضرة بربع ساعة وهاجر وعمر مابطلوش اتصالات بعتلهم ' مشغولة في محاضرة' وسكرت التليفون مرة وحدة
الوقت قعد يتمدد مافاتت الربع ساعة نين خلاص قعدت مقعمزة حاطة ايديا ع وجهي لعند ما سمعت صوت يقولي : متحمسة الباين لليوم 😄
نحيت ايديا وشفتله 'ايه ايه هو الاستاذ المستفز القنين' 🙂
كمل يقول : ماشاء الله منضبطة ... جاية قبلي حتى نا 😊
ابتسمتله بالغصب ونا في خاطري ' ايه منضبطة هلبا حتى النوم ماحسيت بيه 🙂'
رجعت درت روحي مشغولة بالورق اللي قدامي طلع من وراء طاولته وجي وقف فوق راسي 🙂
مراد: مستعدة ولا 😊
قمت راسي شوي شفتله خطف ورديت نشوف للورق وقلتله : ان شاء الله خير درت جهدي في البحث وان شاء الله نكون عند حسن ظنك ورجعت شفتله لقيته يبتسم
مراد : اممم ... بإذن الله حتكوني ع اللي سمعته عليك 😊
نطيت وقلتله : شن سمعت 🙄😳؟
ضحك وكيف بيتكلم بدو يدخلو الطلبة تنحنح ورجع لطاولته
بدت المحاضرة ونا من التوتر ختمت الاذكار والقرآن ورجلي قريب تفك من بعضها ونا نهز فيها 😖🤦🏻♀️
مراد ... قصدي الاستاذ مراد 🤦🏻♀️ بدي يحكي ونا مانسمعش فيه بكل شن يقول وشوية جي في وذني اسمي
مراد : ليال ؟
شفتله بعلامة استفهام عملاقة ع راسي ...
ابتسم وكمل : يلا .. 😊
وقفت في مكاني وقعدت نساوي في الورق وكيف بديت نتكلم
مراد : لا ... تعالي هنا
واشرلي ع طاولته
انا من الصدمة قعدت نشوف يمين ويسار للطلبة كيف يشوفولي
" في العادة وطول ال4 سنين في الجامعة صوتي ماينسمعش متفوقة لكن هادية ولا نحب نشارك لا شي 😅 الا لو انسألت نجاوب ع قد السؤال بس وهادي اول مرة ننحط في موقف زي هكي 🙂 نتذكر قداش شتمته مراد بيني وبين نفسي في هاديك اللحظة ربي يسامحني 😅🤦🏻♀️"
لميت الورق متاعي ومشيت لوين طاولته حطيت الورق ع الطاولة وماقدرتش نقيم راسي للطلبة وبديت نجبد في كم الفانيليا بتاعي
جي وقف مراد جنبي وهمس بصوت واطي : ماتتوتريش ابدي ونا معاك
شفتله وهزيت راسي بمعنى تمام
خديت نفس عميق وبديت نشرح ووين تريح مني شوي يساعدني لعند انسجمت في الشرح وقعد نكمل بروحي وهو وقف بعيد شوي عليا كان واقف وحاط يديه في جيوب الجاكيت ويبتسملي
رديتله الابتسامة وفات الوقت وكملت شرح وشفتله
قعد يصفقلي تحشمت وقعدت حمراء مع بعضي
مراد : برافو ليال ... كان شرح ممتاز احسن حتى مني 💜
ليال : شكرا استاذ 😬
وخديت الورق وجري ع الكرسي متاعي وقلبي قريب يطير من مكانه
مراد: هادي كانت محاضرة اليوم ... شكرا لـ ليال على المعلومات القيمة اللي شاركتنا بيهم 💜 وشافلي بإبتسامة وشوي طلع ورق من شنطته
مراد: وهادا تدريب بسيط نبيكم تجيبوه المحاضرة الجاية مد الورق للطلبة
وكمل يقول : تقدرو تتفضلو كملنا ..
نضت لميت حاجاتي وكيف بنطلع ...
مراد: ليال؟
ونا في خاطري هو اليوم مايبيش يتم بكل الا ونا فاقدة كل ذرة عقل فيا
التفتله : نعم استاذ ..
وقف خدي شنطته وجاني
مراد: ماخيبتيش ظني فيك 😊
قمت عيوني فيه وهو ع وجهه نفس للابتسامة
هكي ابتسامته مريحة مانعرفش كيف
تحشمت وقعدت نجبد في الفانيليا وقلتله : بارك الله فيك استاذ وضحكت وكملت : وهادا المطلوب اثباته 😁
ضحك وبعدين هدى من الضحك وقالي جملة بالفرنسي : Tu es intelligente et si belle
( انت ذكية وجميلة جدا)
وطلع طول ونا قعدة مصدومة مافكرتش حتى نلتفت
في هاديك اللحظة وكأن أبصر من حط عليا سطل ثلج ماقدرتش نتحرك من مكاني مش متعودة حد يجي يقولي كلام زي هكي في وجهي وبالثقة هادي قالها من غير حتى ما يرمش 😳
قلبي يدق بسرعة حطيت يدي ع الجهة اليسار ونا نحكي مع روحي ' ليال ... بطلي خيالات متع افلامك الوردية ... مجرد كلمة عادية يعني ماقالك نحبك ... شن نحبك خيرني حتى نا 😭 عادي قعد يمدح في ذكائك مش هاديك الحاجة الكبيرة ... هادا استاذك ... اوووف '
غمضت عيوني وخديت نفس عميق وطلعت من القاعة ونا ماشية لقيت عمر وهاجر واقفين ع الدروج يستنو فيا
عمر : اهي جت كوكو شانيل 😂🌚
قالها بلكنة فرنسية ع اساس
شفتله ع جنب 😒 وقعمزت جنب هاجر
حطت يدها ع كتفي وقالت بتحمس : ها شن صار ؟؟ من بكري ع اعصابي نستنى 🤭
عمر : احكيلها لان نفختلي راسي وهي تنقنق من بكري 😒
هاجر : انا انقنق صار 🙂
وبدو يتنابشو ونا مش مركزة بكل ' شن اللي قعد يصيرلي هادا 🤦🏻♀️'
شوي وطلع مراد من القسم شافلي وابتسم ونا وجهي قلب اصفر ودرت روحي نلعب بظوافري ..
عمر : ليال ..؟
نطيت وشفتله : ها ؟ 😳
عمر : بالشوية عليك خيرك تقول شفتي جني ؟ 🙄
شافتلي هاجر وكملت عليه وهي شادة وجهي : ورايحة صفراء زي الليمة
شفتلهم الزوز : كان خشيتو طب مش احسنلكم تحليل طبي ممتاز 🙄😅
وبعدين كملت قبل مايحسو بحاجة : هي نمشو ناكلو حاجة قعدة بلا فطور 😅🤦🏻♀️
خبطني عمر ع راسي بالشوية : ناقصة ماهو انتي رايحة زي مدمني المخدرات 😒😂
شفتله وقعدت نعلق ع كلامه بصوته : رايحة نيينينينينني 😒... هل شايف نفسك في المراية ؟
هاجر : خلاص بطلي انتي وياه 🙂 .. وتقولولي تتكلمي هلبا .. 🤦🏻♀️ هي نوضو
مشيت معاهم للكافيتيريا بس عقلي مش معاي ابدا
" عارفة رد فعلي كان غريب لان عمري مانحطيت في موقف هكي مانعرفش نتعامل مع جنس ادم ابدا 🤦🏻♀️ عادا يوسف وعمر فقط ...وشي زي هكي ... هههه .. كان غريب بجد ..
كنت في علاقة حب ؟ .... ابدا .... ولا حتى بالكذب 😅 نشأت متوحدة ع قولت عمر وهاجر 😅"
خدينا فطور وقعمزنا تحت شجرتنا المعتادة كانو يهدرزو ونا شادة القهوة متاعي بين يديا وسرحانة
نين شوي نخصتني هاجر : هيا احكيلنا شن صار
عمر : ندمت ماتخصصت معاك فرنسي ره تشمتت فيك نين شبعت اليوم 😂🤣
ليال: ها ها ها دمك عصير لوز 😒 نوض نوض احسن مانكلم عمي عبدالكريم ونحكيله ع هاداك الموضوع 🙂
عمر شرق بقهوته😳 : ليالي ..... عازمك ع الغداء غدوة انتي ونسومة ويوسف شن رايك 😅
ليال : نختار المطعم انا 🙂😌
عمر : من عيوني قداش عندي ليال انا 😅🙂 هاك شوكولاتة 🍫 رقي بيها السكر 😅
ليال بصوت واطي : تمشيش الا هكي انت 😒😌
عمر : حسبي الله وخلاص 🙂
سمعنا احححححم تلفتنا لهاجر الزوز
هاجر: ممكن تفهموني شن تحكو علاش ديما زي الاطرش في الزفة بينكم 🙂
شفنا لبعض انا وعمر وضحكنا 😂
هاجر : اوكي اوكي استاذ عمر واستاذة ليال اقعدو فيها نمشي محاضرتي خير 😒
ليال: غير تعالي هنا والله نبصرو 😅
هاجر: يا باردين عندي محاضرة جديات والمادة هادي ازفت منها مافيش ركبتلي الاعصاب 😭
عمر حط طاسة القهوة جنبه وقال : ماهو كان شادة في قرايتك ومسيبتلي الدفنقي الزايد ره مش هكي صاير فيك 🙂
شبحتله هاجر وعيونها تعبو دموع كانت اللهجة اللي حكي بيها عمر صريحة بكل شفتله وقلتله : عمر ... سكر ع الموضوع
عمر شافلي ع جنب وقلب عيونه
شفت لهاجر لقيتها تاخد في شنطتها
ليال : جوج عمر مش قصده يحكي هكي انتي تعرفيه
هاجر وهي تمسح في دموعها بقوة : لاني نعرفه فاهمة قصده كويس بكل ... حولي ليال.
دفتني ع جنب وخلتني انادي فيها ومابتش. ترد عليا التفتت لعمر ونا معصبة : عاجبك هكي توا ؟؟ ارتحت ؟
عمر وهو معصب : تي قعدة تخرب في حياتها بيدها تبيني نتفرج خيرك ليال ... انتو زي افراد عيلتي مانتحملش نشوف وحدة فيكم ادير غلط وماانبهاش وهاجر نبهتها اكتر من مرة وهادا كله قعد معقل روحي ونهدي في روحي اني مانمشيش نخربله وجهه هالزفت نعيم ...
كان يتكلم بعصبية وكلامه كله صح ولوهلة حسيت بالذنب ليش حكيت لعمر ع الموضوع 🤦🏻♀️
ليال : اوكي اوكي اهدى الناس يشوفولنا
تلفت عمر يمين ويسار شاف بنات وشباب منتبهين معانا غمض عيونه وقال : انا طالع مروح ... ماتبي شي ؟
شفتله وهزيت راسي بـ لا 😟
مشي عمر من بجنبي ونا وليت قعمزت ع الكرسي وفي خاطري ' شن مزال ماصارش في هاليوم '
تنهدت وعيوني تعبو دموع وحطيت يديا ع وجهي وقلت بصوت واطي 'يارب'
" كانت اول مرة تصير مشكلة هكي بينا نتذكر قعدت نبكي ماكنتش متخيلة يجي يوم ويصير هكي بينا وللأسف ماكنتش المرة الاخيرة 💔"
وفجأة حسيت بحد جنبي.......
……………………………………………………………………
السؤال هنا ..... 🤔
اى الى هيحصل مع الثلاثي المرح؟
من يكون مراد ؟
نتلاقى في الجزء الجاي 💜
إرسال تعليق